براكاج بين ضحك و لعب

:قطعي وقّف بوهاليّة نهارت سبت عشيّة

يا طفلة آقف نحكي معاك

(بففف ناقصني كان فرخ يكمل على مرمت هالنهار لرڨط لا يزي نهار كامل خدمة لا يزي مافطرتش اش يحب هاذا تو) 

  لا انا مانيش بش ناقف هيا انت امشي كان ظهرلك مزروبة ماعاش بكري

إي شبيك حاڨرتني و تحكي معايا بالصعيب آقف لحضة وامشي

استغفر الله! هاني وقفت تفضل

تعطيني تليفونك؟

لا

علاش لا؟ خليني نحكي معاك بالسياسة

خاطر مانحبش نعطيهولك

بالله؟!

والله!

واشبيك تعيط؟

مانيش نعيط اما راك بش تردني نعيط

شو ماللخر انا راني خليقة هوني و ماينجم يعرضلي حد و هاو نوريك عندي لام في يدي و كنت نجّم نتصرف معاك تصرف آخر

لوووووول صار انتي تحب على الاپاراي موش النومرو لوووول تي مو قول هكّا مالّول، تاخو اما تخليلي الپيس

اي نحي الپيس و هات فيسع

لوووول في بالي انا المزروبة، تي هو ماحبش يتحل!

سيب هنا تو نحلو انا

لا لا تو تهزو بالپيس

والله لا، ايا سيب فك

سارق و تحلف و تحبني نصدقك

(تنبز و شويا لاجبد عليا بيه الام)

شد

شد نحي الپيس 

تي كيفاش تخرج هاذي؟!!

فففف حتى هاذي وحلت فيها! سيب هنا!

لووووول والله واحد ينحيلي في تليفوني وانا نضحك قريب نقولو مرسي

مزاية؟؟؟

لوووووول لا خدمت عليه معايا

ايا كمل هات 10 لاف خليني نمشي

لووووول تاليفون و 10 لاف موش برشة؟

(قلب وجهو و تنرفز)

 فففف ايا هات عاد و بلا حس

تي هاك انتي تعيط، باهي تاخو 5 لاف؟

فففففففف ايا بش تمد و لاّ....

ووه شبيك تغششت هاك

عمناول لوقيت هاذا تليفوني تسرق! تقريب نعود نقرا حسابي نحط تليفون على شيرة على ما تواتي

:'(

عالاقل المرّة هاذي منعت الپيس

:p :p

نحمد في ربي الي مابدلتوش الجرد 

هاوكا عالاقل تعبتو عليه طرف هههه مشيت بيه مسافة موش خصيصة

:p :p

و ما خفي كان اعظم كان قالي هات الساك راني رصاتلي مستميتة عقاب عشية

لووووول و برّا ان شاء الله كل مايعطي ربّي باللّطف