Chimiothérapie

ما ناقصهم كان كعبة لاكريموجان و كرطوشتين عالفازة!

مضاهرات و ا عتصامات قدام لوزارات

شباب و شياب يحكيو في السّياسة في الشوارع

شيخ امام في الاذاعات

هذا لكل ولّى عادي بعد 14 جانفي 2011، نهار بش نحكي عليه لحفار قبري

نهارت الّي تونس تنفست الحرّيّة

استنشقنا الحرّيّة لين سكرنا، شعب كامل سكران

انا وحدة مالناس قعدت اكثر من جمعة شايخة في مخّي، أْن اكستاز كيما يقولو

ندور في الشارع ما فما حتّى پوستار لبن علي يا رسول الله! بح! لكلهم طاحو كيما طاح هو، طيّحو الشّعب موش قطعي آخر

الخلايق متاع الحومة ولاّو فتوّة و يعسّو على ارزاق النّاس، شي يدوّخ

هذا هو بيدو شعب الكورة و عندي منقلك؟

هوكة عاد كل واحد شيسمّيها، واحد ثورة الحرّيّة و واحد ثورة الياسمين و واحد انتفاضة و واحد احداث

و فيسع ولاّت خبزة ڨطو كل واحد يحب ياخو منها باي، كل واحد يجبد ليه و يقول بدات من عندي

و برشه لحّاسة قلبو لفيستة و ولاّو يسبّو و يلعنو في بن علي، جماعة مات الملك عاش الملك، أما المرّة هاذي صعيبة عليهم، المرّة هاذي الملك هو الشّعب

شعب أراد الحياة

و ظهرو برشة كاراكوزات كيما بن بريك الّي حبّ ينصّب روحو نبيّ الثّورة ههه دوّيو كان انت جعت نهارات فما ناس جاعت سنين و ناس ماتت 

و الكاراكوز الكبير العربي نصرة، دخل للحبس متهوم بالخيانة العظمى خرج حاسب روحو المهدي المنتظر! قالك انا سيد الكل، فيق يا شفيق!!! سيدنا ربّي وفى عهد الشّرك و ماعاش راجع

اما كي سمعت الّي فما ناس استغلت الوضع بش تسرق و تخرب، ناس لاباس بيها ناس زعمة مثقفة طامعة في ماكينة صابون ولا پلازما ولا في كيلو مقرونة

كي سمعت ناس بعد 3 ايام تتشكى من نقص الحليب و من غلاء اسوام الحوت في المرشي!! زح 23 سنا ماتشكاوش من نقص الاكسيجان

كي شفت الّي التلافز تعمل وحدها في تعتيم اعلامي

كي بداو يحكيو على مؤامرة و اجهاض الثورة و انقسامات وفوضى  و تدخل اجنبي و ريق 

تكبست، فقت...

الشهداء ماخلاّونّاش كان الحرّية، خلاّونّا معاها مسؤوليّة قدها ولاّ اكبر منها 

الشّعب عاش فيه ورم خبيث 23 سنة و  تفشّى في بدنو لكل، ورم ماسموش بن علي و لا ديكتاتوريّة، ورم اسمو الخوف 

في 14جانفي الشّعب التّونسي استأصلو اما موش كافي، باش الورم مايرجعش لازم يكمّل يعمل شيميو

في الاول شعرو باش يطيح، باش يتعب ويدوخ، باش يتوجع

بش تتعدّى عليه نهارات يتمنّى فيها الموت و نهارات يحسّ روحو هرقل

و في الاخر بش يبرى 

لذا ظاهرلي أهمّ مسؤوليّة هي الي الرجوع للخوف لا! لا من فلان شادّ الكرسي و لا مالمظاهرات الّي موش ناوية توفى و موش بش توفى و لا من مؤامرة أجنبيّة

لا على الاقتصاد مالثّورة و لا مالثّورة على الاقتصاد...بش نحصّلو لكل

اذا كان الشعب يقعد ديما شوكتو واقفة، ما يمّن حدّ، ديما عينو على حقّو، ديما مستقتل على حقّو ماياخذهولو حدّ

الثّورة ما نجحتش بطياح بن علي و لا حزبو و لا حكومتو، الثّورة تنجح كي نوصلو نعملو انتخابات حقّانيّة و نختارو موش رئيس أما ممثّل للشّعب و بعد 5 سنين نبدلوه

كي الانتخابات البلديّة و التّشريعيّة خاصّة تلقى اقبال و تغطية اعلاميّة أكثر مالانتخابات الرّئاسيّة 

اما من هنا لوقتها مش حتقدر تغمّض عينيك