منظر شنيع مرّرلي المرواحة اليوم، منظر مجزرة على ضفاف مجردة. منظر الفراغ!
ماضاهرلي كان فمّا شكون استعمل الطريق الوطنية تونس بنزرت و ما عشقش منظر الكالاتوس على طول ضفاف مجردة (و على طول الطريق الوطنية بكري يا حسرة)
اليوم خزرت ماقيتوش!! بكلّو قصّوه :'(
لحكاية هاذي تنجّم تقول استانسنا بيها في "العهد البائد"، كالاتوس بنزرت عانى من حملة ابادة اش قالك آش قال عليك يشذبو فيه، صفحة ڨنڨلة تعملت عمناول كردّ على الاجحاف و التمادي في هالجريمة هاذي و تنجمو تلقاو فيها تصاور تغني عن كل تعليق. بكلنا نعرفو الشّجر قبل علاش كان يتقصّ و توّة ؟؟؟؟ شكون المسؤول؟؟؟
الكالاتوس مش كان منظر، هو رواري لبلاد، شكون تو مازال بش ينجم يعمل پيكنيك على مجردة و يفرهد صغيراتو ما غير ما يتنكب في شطر شهرية؟ لا عاد شجرة تضلل و لا عادت نسمة نظيفة، والفاميليات الّي كانت تحطّب طرف و تعمل كالمردومة بش تبيع كطرف الفحم قطعولهم رزقهم. ما ياكل كان الغول في تونس؟
شيء يقهر!
