الانتقال الدّيمقراطي

السّلام عليكم

لا لا هاذي دخلة كلاسيك، نحبّو دخلة قويّة تتماشى مع جو الثّورة بش يتفاعلو معاك النّاس

باهي باهي...بسم اللّه الرّحمان الرّحيم

هاهي ها محمّد صالح!  كمّل قول أيّها المواطنون أيّتها المواطنات بش تكمل

اتّق اللّه يا ولدي مالا ماعاش نسمّيو بسم الله في جرة المنزوس

اخطانا ما هالمداخل، توّا واكلة بعضها بين الاسلاميّين و العلمانيّين وحتّى بسم الله تنجّم تتأوّل، قتلك شوفلنا حاجة مواتية الثّورة

شقولك نبدا بالرّحمة على أرواح الشّهداء؟

برافو! هاك فهمتني، واعمل فيها متأثّر و مركي پوز لين يكملو يصفقو

و كي مايصفقوش؟ ناس كرهت التّصفيق

ههههه يضهرلك...و لازمك تركّز على دورنا الفاعل في الثّورة و كيفاش كنّا من المحرضين عليها

...اِيه و الحزب و توجّهاتو و راينا مال

حبّس حبّس! قيلا جدّت عليك حكاية الشفافية و المصداقية؟ يا ولدي البلاد داخلة في حيييط هات نخلطو لكلبليصة بعد تو نشوفو توجّه ولاّ زوز نتبنّاووهم، احنا و جو اللّحضة

...

خمسين حزب يغنّيو في فرد غناية و يقولو ماعنّاش وفاق وطني هه 5

حتّى الحزب الّي كيما نقولو عاقدة فيه النّوّارة طلع يبيع في الرّيح للمراكب

عاملين اجتماع عام و قاوق بش يحكيلي على الثّورة شكون صنعها و لوين باش نصدروها، باقي عايشين دور الرّيادة، فكروني في الشّعار القزوردي "السّنة دوليّة و المبادرة تونسيّة"...توّة وقت قوميّة عربيّة هو؟؟ تي هات وضّحلي كوجينتي شصاير فيها بعد يعمل اللّه

ما عطاو حتّى موقف واضح، كلها شعارات عريييييييضة

والّي حاضرين عاد قصّة اخرى، تقول مستانسين يحضرو لخطابات الغير مأسوف عليه، كل شوية تصفيق، ناقصتهم كشاكل و حماة الحمى بين الفينة و الاخرى

و لاخر طالع يعرّف بنفسو انا فلان الفلاني من شباب القصبة...شمعناها؟؟ انتماء ولّى؟؟

الحاصل، ضاهرلي النّاس لكل كان مشروعها السّياسي خبز و ماء و بن علي لا، طيحو بن علي مازالت العيشة على الخبز و الماء هانا خالطينلها ماناش مطولين