خرجت اليوم مالخدمة و بديت نهڨّ في محمد الخامس بش نخلط على الدّخلة متاع تميم البرغوثي في قصر المؤتمرات، الامسية نورمالمون تبدا الخمسة مع ربيّع ساعة روتار نجي ڨدڨد. ايا كبست روحي و خلطت في الوقت، أوّل ما نلقى في الباب لافتة : حركة الشّعب الوحدويّة التّقدّميّة... والله ما نعرف!! ماكمّلتش قريت!! طحت لوف في الحركة طوووول، لا مش لتوجّهاتها القوميّة العربيّة اما لذكاءها التّرويجي، انا وحدة مالنّاس جاية مافيباليش الّي الامسية منضمها حزب و هالحركة مانيش سامعة بيها قبل خلاص، ما نعرف شكونو ولاّ شكوني مرحوم(ة) الوالدين الّي بعثلي انفيتاسيون على فايس بوك. دخلت نلقى الصالة معبّية، صالة ترفع 2000 فرطاس، انا سلّكتها قيت وين ناقف، هذا والعشويّة مازالت مابداتش!! بصحّتهم.
بعد نصيّف ساعة مستنية، طلّ علينا ماهر بالحاج بمورسو عود ياسر قمقوم ماتصنتو حد!!! بعد دخل تميم في غمرة من الهتافات : الشّعب يريد تحرير فلسطين، شعب عربي واحد... و بالطبيعة تصفيـــــق. تقلّي تميم يستاهل، نقلّك اصبر هاو جايك لحديث. تو هي قصائد تميم مالّي تبدا لين توفا درر، كان في كل كلمة بش تصفّق اتخذنا، هو يخلط لاقوى عفسة و...تصفيـــــق، تي خلّي الكازي يكمّل و صفّق على راحتك، الحاصل زايد شعب صفّاق و لازمو صرفاڨ...كذبو عليه و قالولو ذوّاق، صدّق!! توّا يا رسول الله ماهر بالحاج ما يتسمعش!!!
ماعليناش هاني استمتعت بقصائد تميم و عملت كيف وانا نسمع في آراء تميم استاذ العلوم السّياسيّة، بالعمل كي خرجت ما خلّيت ورايا كان مالّي الفرح ههههههههه
و بخلاف اللاّفتات ما صار حتّى حديث على الحزب المنظِّم و لا شكر و لا ريق هاي الاحزاب مش قالك علب ليليّة ولاّ كسكروتات
بالشّاميّة!!
